O PP DE SALCEDA DE SALCEDA PIDE A DIMISIÓN DO CONCELLEIRO ENRIQUE CABALEIRO

Imaxe do Blog Oficial de la Agrupación Socialista de Tui

Os populares apelan que nos últimos meses o edil socialista está a centrar o seu traballo como candidato á Alcaldía de Tui, deixando de lado as cuestións que lle competen no Concello de Salceda e polas que recibe unha retribución económica

O Partido Popular de Salceda de Caselas continúa no seu asombro ante o feito de ver cómo un concelleiro da corporación municipal salcedense “dedícase a vender o benestar e a calidade de vida dos veciños do Concello de Tui”, sinala Santiago Rodríguez Davila, presidente do PP local e candidato á Alcaldía. Trátase do socialista Enrique Cabaleiro, o cal está a recibir unha compensación económica por ser concelleiro en Salceda e velar polo ben deste municipio e dos seus habitantes “e o que realmente leva facendo nos últimos meses, sendo presentado xa oficialmente como candidato á Alcaldía de Tui polo PSOE, é traballar de cara ás vindeiras eleccións centrándose unicamente en Tui”, subliña Rodríguez Davila, motivo polo cal dende o PP local “pedímoslle que se vai definitivamente de Salceda, que dimita como concelleiro e deixe de cobrar a conta dos salcedenses para traballar logo a prol dos habitantes doutro municipio”, engade.

Dende o Partido Popular de Salceda de Caselas sempre respectaron a decisión de Cabaleiro de comezar unha nova etapa política noutro municipio pero o que non comparten, e rexeitan totalmente, é o xeito de levar a cabo todo este proceso. “É inadmisible que un edil do Concello de Salceda de Caselas, pagado por todos nós, estea a traballar polo pobo de Tui, deixando xa de lado todas as cuestións referentes a Salceda. Se o que quere realmente é liderar a lista dos socialistas tudenses que dimita xa como concelleiro en Salceda para dedicarse exclusivamente aos temas que agora lle competen e dos que vai alardeando nos medios de comunicación”, conclúe Rodríguez Davila.